Агненная трагедыя ў Беразоўскім раёне: на пажары загінулі чацвёра дзяцей

– У Ястрэблі дом гарыць на вуліцы Лясной, – паведаміў сёння днём беразоўскім ратавальнікам Брэсцкай вобласці заклапочаны сведка. – Дзяўчынка сказала, што ў доме ёсць дзеці. Дарослыя на вуліцы – там адна жанчына.

Позней менавіта гэтая жанчына патэлефануе на лінію «101» і ўзбуджана раскажа, што ў агнявой пастцы знаходзяцца чацвёра яе малалетніх дзяцей.

Работнікі МНС аператыўна прыбылі да месца выкліку. У доме «гаспадарыў» агонь. Унутры ратавальнікі знайшлі чацвярых загінулых дзяцей ва ўзросце ад 2-х месяцаў да 6 гадоў. З агню выратавалася 37-гадовая жанчына (маці загінулых дзяцей) і яе чатырохгадовая дачка.

Агонь знішчыў дах, перакрыцці, маёмасць у доме, пашкодзіў сцены.

Прычына здарэння ўстанаўліваецца.

Шаноўныя грамадзяне! Для таго, каб папярэдзіць пажарныя ЧС і не стаць іх ахвярамі, выконвайце правілы пажарнай бяспекі. Не паліце ў ложку, не выкідвайце непатушаныя сірнікі і цыгарэты; сачыце за станам электроправодкі, выконвайце правілы эксплуатацыі газавага абсталявання і печнага ацяплення. Удзяляйце ўвагу забеспячэнню бяспекі дзяцей, з ранняга ўзросту навучайце іх дзеянням пры пажары. Усталюйце ў дамах аўтаномныя пажарныя сігналізатары, якія могуць папярэдзіць аб небяспецы на ранняй стадыі. У выпадку пажару тэлефануйце ў службу выратавання па тэлефонных нумарах 101 або 112. Беражыце сябе!