2 ліпеня, Віцебск /Кар. БЕЛТА/. Унікальны перасовачны музей "Поезд Перамогі" 2 ліпеня прыбыў у Віцебск, перадае карэспандэнт БЕЛТА.
Састаў з дзясятка тэматычных вагонаў спыніўся ў горадзе на два дні. Інтэрактыўная экспазіцыя прысвечана подзвігу савецкага народа ў гады Вялікай Айчыннай вайны. Кожная частка поезда - гісторыя асобна ўзятага часавага адрэзка. У храналагічным парадку наведвальнікі знаёмяцца з перадваеннымі гадамі, бязлітасным перыядам Вялікай Айчыннай і доўгачаканай для савецкага народа Перамогай: лёсы, успаміны, гістарычныя факты. Наведвальнікаў музея суправаджае аўдыягід, прапануючы разам з героямі прайсці шлях ад Гомеля да Масквы і ад Сталінграда да Берліна. У мінулым годзе музей папоўніўся новым вагонам, цэнтральнай тэмай экспазіцыі ў якім сталі ваенныя трыбуналы над нацыстамі.
Састаў у Віцебску сустрэлі ўрачыстым мітынгам. У памятнай акцыі прынялі ўдзел памочнік Прэзідэнта - інспектар па Віцебскай вобласці Сяргей Ляўковіч, старшыня Віцебскага абласнога Савета дэпутатаў Дзмітрый Дзямідаў, кіраўніцтва горада, прадстаўнікі арганізацый, студэнты і школьнікі.
Першымі ўнікальны перасовачны музей наведалі ганаровыя госці мітынгу. "Уражанне такое, быццам акунаешся ў рэчаіснасць, якая была перад пачаткам Вялікай Айчыннай вайны, у час і пасля. Уражвае музейная экспазіцыя вязняў фашысцкіх канцлагераў. Гэта настолькі моцная перадача таго настрою, стану, але самае галоўнае - веры ў тое, што мы пераможам. Гэта вера і сёння перадаецца з пакалення ў пакаленне", - адзначыла старшыня Віцебскага гарадскога савета грамадскіх аб'яднанняў ветэранаў Ларыса Аленская.
Яна дадала, што Вялікая Айчынная вайна - адна з самых разбуральных і кровапралітных у гісторыі чалавецтва. “Я ўжо не кажу аб тым, што яна забрала мільёны жыццяў, разбурыла дзясяткі тысяч гарадоў і вёсак. У прыватнасці, нават калі ўзяць Віцебск, які ў гэтым годзе адзначыў 80 гадоў свайго вызвалення, мы можам сказаць, што гэта прыклад генацыду савецкага народа. Таму што горад быў поўнасцю разбураны і воінаў-вызваліцеляў сустракалі 118 жыхароў. Таму такія музеі на колах падкрэсліваюць гістарычную хроніку падзей Вялікай Айчыннай вайны, а тут мы гаворым і аб мірным часе ў перадваенныя гады, той радасці жыхароў нашай рэспублікі, іншых рэгіёнаў. І такі нечаканы пачатак вайны для іх сапраўды быў узрушэннем".
Музей пачаў свой шлях па краіне 21 чэрвеня ў Брэсце і завершыць яго 21 ліпеня. У маршрутным лісце саставу - 23 беларускія гарады, уключаючы ўсе абласныя цэнтры і сталіцу. Як адзначалі ў БЧ, графік руху складзены з улікам знамянальных, памятных дат і тэхнічнай магчымасці інфраструктуры аператара беларускай сеткі чыгункі.
Кожныя пяць мінут у музей заходзяць групы па 12 чалавек ва ўзросце ад 12 гадоў. Экскурсія займае 45 мінут. Экспазіцыя прабудзе ў Віцебску 2 і 3 ліпеня з 10.00 да 20.00, перапынак з 14.00 да 15.00.-0-