29 студзеня, Мінск /Кар. БЕЛТА/. У Беларусі ўстаноўлены парадак пералічэння часткі плацяжоў за лесакарыстанне ў 2025 годзе. Гэта прадугледжана пастановай Міністэрства лясной гаспадаркі ад 20 студзеня нумар 1, якая апублікавана на Нацыянальным прававым інтэрнэт-партале, паведамляе БЕЛТА.
Дакументам устаноўлена, што ў 2025 годзе плацяжы за лесакарыстанне ў памеры 25 працэнтаў (плата за лесакарыстанне, вызначаная зыходзячы з таксавага кошту, які ўстанаўліваецца Саветам Міністраў, арэндная плата за карыстанне ўчасткам ляснога фонду), вылічаныя па тэрмінах выплаты ў 2025 годзе арганізацыямі, падпарадкаванымі Міністэрству лясной гаспадаркі, пералічваюцца лесакарыстальнікамі на рахункі галоўных упраўленняў Міністэрства фінансаў па абласцях і Мінску, адкрытыя для залічэння плацяжоў. Кантроль за выплатай ажыццяўляецца падатковымі органамі па месцы пастаноўкі на ўлік лясгасаў.
Пры рэалізацыі драўніны на пні на біржавых таргах ААТ "Беларуская ўніверсальная таварная біржа" пералічваецца плата за лесакарыстанне, вызначаная зыходзячы з таксавага кошту, у памеры 25 працэнтаў.
Пастанова ўступае ў сілу пасля афіцыйнага апублікавання і распаўсюджвае сваё дзеянне на адносіны, якія ўзніклі з 1 студзеня 2025 года.-0-
Да спіса